I strati unni caminu..

di Giuseppe Galfo

Ne strati unni caminu s'incontrunu cientu manu chidda fina ro dutturi e chidda lurda ro viddanu genti sula..accumpagnata..ncapu o sceccu oppuri apperi 'n centru i strata ne banchini o misi i lato a cantineri. 

Ne strati unni caminu c'è sempri ummira frisca sutta e macci i miennila ri carrua o ri virdisca sunu macci antichi comu sta terra critusa sturciuti arruppati vacanti e che purtusa Terra..terra mia...terra ri mari unni finisci l'acqua spunta u suli terra ri turmientu fai scappari ma cui ti lassa..cà si scorda u cori. 

I strati unni caminu su ri pruvulazzu e petri tra scrusciu ri catini e trivulu ri matri si senti cu vannià tra li mura stisi o suli mentri cu avi ancora ossa li metti a ripusari. Ne strati unni caminu c'è cui s'ammuccia li stenti e sfoga la so ragghia sutta a vara ri li santi mentri u parrucu cumanna "in prucissioni.. tutti 'n fila" a chiesa resta o scuru..nun sadduma na cannila. Terra ..terra bedda.. amata terra quanta genti ca vulissi ma nun parra terra ri gelsuminu e lustru i luna c'è cui arriri e c'è cui cianci a la furtuna Pi strata ncontru genti ca facci comu fezza travagghiunu ri lingua e fanu assai scumazza t' abbattunu la spadda mi fariti curagghiu comu ci runi i spaddi rapunu u curtigghiu. Ne strati unni caminu s'affaccia nu jardinu unni crisci na racina pi nu vinu truoppu buonu pa missa nu parrinu c'appuzzau lu mussu e si persi iddu a tuonica cu tuttu u crucifissu Terra...bedda terra...terra santa cui sordi n'avi picca sempri i cunta cu mangia assai puoi ci lori a panza pi cui nun mangia nenti è pinitenza Ne strati unni caminu c'è cu si voli beni la genti balla e canta pi scurdarisi li peni vulissi sulu jucari a carti nterra cu la sorti ma idda teni u jocu e a lu piettu i stringi forti. I strati ri sta terra su fatti ri spiranza e portunu tutti quanti o puntu ri partenza unni tuttu nasci fra terra mari e suli unni ci lassi a rarica ci truovi puri u cori. terra.. mi parturisti matri terra pirdunulu stu figghiu ca ti sparra si turmenta e ti vulissi pani si turmenta ma ti voli beni.