Fatta cu sacrifici e tinuta 'nta cascia ppi vintanni, aspittannu ca a picciridda criscia.
Ogni tantu a matri rapia a cascia e facia virri e vicini i casa linzola, cuperti, tuvagghi i tavula
"
Chista e' pi cunzari u liettu, quannu ma figghia sa spusa ".
E rapiennu a cuperta fatta che sa manu si viria ca era cuntenta .
Ogni puntu era comu nu pinzieru ca partia ro cori e si stampava 'nto jancu ro linu.
A robba era na varizia pe matri.
Nu pinzieru ca nascia ca figghia fimmina.
Nu vantu pi diri ca quannu era ranni macari sa figghia si putia spusari cu tuttu l'ordini ra chiesa.
Se puoi ci rava menza casa , se putia , a
cosa era fatta.
Robba fina.
Taliata comu si talia na cosa priziusa.
A cascia si incia.
E u tiempu passava.
Finu a quannu arrivava u juornu ca a cuperta ro spusaliziu supra o liettu re ziti si facia taliari...
E a matri cuntentaci passava a manu i supra.
Era na carizza r'amuri.
